Weiwei humb betejën me autoritetet kineze

Një gjykatë kineze i shqiptoi të enjten gjobën 2,4 milionë dollarë për shmangie tatimi kundër disidentit më të famshëm kinez, Ai Weiwei, duke i dhënë fund kështu betejës së tij të gjatë gjyqësore me autoritetet kineze.

Kjo ka hapur rrugën për burgosjen e tij, në rast se nuk i përmbush obligimet. Rrëzimi i apelit të dytë të Weiweit në Gjykatën më të lartë të shtetit nënkupton se artisti me famë botërore rrezikon të përfundojë prapa grilave, nëse nuk e paguan gjobën e mbetur prej rreth 6,6 milionë jenësh (1,05 milionë dollarë), në një rast që ka venitur edhe më shumë reputacionin edhe ashtu jo aq të mirë të Kinës, për sa u përket të drejtave njerëzore.

Ai ka paguar një pjesë të gjobës që ishte caktuar. Weiwei, arrestimi 81-ditor i të cilit kishte shkaktuar zemërim  ndërkombëtar, ka thënë se nuk do ta paguajë gjobën e mbetur në mënyrë që ta ngrejë në një stad më të lartë legalitetin e rastit, për të cilin ai gjithnjë ka thënë se është politikisht i motivuar.

“Në rast se më duhet të shkoj në burg, atëherë nuk ka asgjë që mund të bëj”, ka thënë ai. “Ky shtet nuk është i drejtë dhe ligjor, edhe pse kam paguar pjesën më të madhe, ende mund të shkoj në burg. Ata nuk kanë nevojë për arsyetim për të më arrestuar, pasi gjithnjë mund të gjejnë një gjë për ta bërë këtë”.