Vetëshpërndarja e Parlamentit mund t’i përshpejtojë zgjedhje

Vetëshpërndarja e Parlamentit mund t’i përshpejtojë zgjedhje

Vetëshpërndarja e Parlamentit mund t’i përshpejtojë zgjedhje Komisioni parlamentar për legjislacion brenda javës së ardhshme pritet të përfundojë punën në Projektligjin për Reformën zgjedhore.

Kryetari i këtij komisioni, Arben Gashi, tha se nuk ka arsye që rekomandimet e Komisionit të Venedikut të merren parasysh, pasi nuk ka pasur ndryshime të mëdha.

”Besoj se shumë shpejtë ligji do të jetë i gatshëm sa i përket punës në Komision, … ne besoj se brenda javës së ardhshme do ta kemi të gatshëm ligjin për lexim të parë”’, theksoi Gashi.

Edhe anëtari i PDK-së në Komisionin për legjislacion Arsim Bajrami shprehu përkushtimin që ligji aktual i zgjedhjeve të përmirësohet.

Sipas tij, me rëndësi është që zgjedhjet të jenë të përgatitura mirë dhe të mbahen në kushte normale: “Ne jemi të gatshëm të ndërtojmë një konsensus me të gjitha partitë politike për dinamikën dhe vëllimin e Reformës zgjedhore, por gjithashtu edhe për kohën më të përshtatshme kur Kosova mund të shkojë në zgjedhje.

Ajo çfarë kërkojmë është që zgjedhjet të jenë mirë të përgatitura, që të mos ketë improvizime dhe për neve nuk është me rëndësi a do të mbahen zgjedhjet në qershor apo në shtator. Është me rëndësi se a do të mbahen në kushte normale në një stabilitet politik dhe ato të prodhojnë zgjedhje të mira me standarde ndërkombëtare”, tha Bajrami.

Megjithëkëtë, Gashi tha se LDK është e gatshme për zgjedhje kurdo që mbahen ato: “Çdo parti serioze duhet të jetë e gatshme të shkojë në zgjedhje, edhe LDK është e gatshme të shkojë në zgjedhje. Në sistemin aktual zgjedhor mund të shkojmë në zgjedhje, risku mund të jetë më i madh, por në politikë je për me marrë edhe risqe”, tha Gashi, njofton rtk.

Por, Arsim Bajrami nga PDK është i vendosur që nuk do të kërkohet nga Qeveria që të hapë rrugë për zgjedhje të parakohshme.

”Nëse eventualisht ekziston vullneti i partive politike për zgjedhje eventualisht ekziston mekanizmi i vetëm i vetëshpërndarjes së parlamentit. Parlamenti në bazë të Kushtetutës mund të votojë vetëshpërndarje dhe vetëshpërndarja imponon edhe zgjedhje të parakohshme, pra kësaj radhe nuk do të pritet që qeveria të luaj rol ne debllokimin e situatës eventuale politike por parlamenti duhet të gjykojë vetë se në cilin moment është me e përshtatshme për partitë politike shkuarja në zgjedhje të parakohshme apo të rregullta”, tha Bajrami.

Ndërsa, sa i përket rekomandimeve të Komisionit të Venedikut që zgjedhjet të mbahen 6 muaj pas përfundimit të Reformës zgjedhore, për Gashin kjo nuk ishte dashur të merret parasysh. Kjo për arsye se nuk janë ndryshime të mëdha në ligj.