Ministria e Forcës së Sigurisë ka reaguar ndaj letrës së hapur të drejtorit ekzekutiv të KMDLNJ-së, Behxhet Sh. Shala, drejtuar komandantit të FSK-së Sylejman Selimi, ku ai kundërshton mënyrën e përjashtimit të disa pjesëtarëve të kësaj force.

Në këtë komunikatë të Zyrë për informim të MFSK-së, jepen sqarime lidhur me mënyrën dhe procedurat e rekrutimit në FSK dhe ndër të tjera, theksohet se procesi i verifikimit të pjesëtarëve të FSK-së është duke u realizuar nga KFOR-i, me mbështetjen e Qeverisë së Kosovës.

Procesi i verifikimit të së kaluarës – siç theksohet më tej – është proces i besueshmërisë ne mënyrë që të mbrojë dinjitetin e individëve dhe Ministria e FSK-së nuk mund të komentoj rastet individuale.

I tërë procesi, siç thuhet në komunikatë, është transparent, i cili ne asnjë mënyrë ligjore, juridike dhe morale nuk përjashton njerëz të cilët kanë qenë ish pjesëtarë të UÇK-së, ish pjesëtarë të TMK-së apo rekrut nga shoqëria civile ku deri me tani mbi 1.000 pjesëtarë kanë kaluar procesin e verifikimit si ish pjesëtarë të TMK-së, përfshirë këtu edhe vet komandantin e FSK-së dhe udhëheqësit e FSK-së.

Komandanti i FSK-së është i obliguar t’i respektojë ligjet dhe rregulloret në fuqi për çka edhe në pajtueshmëri të plotë merr vendimet e duhura. Te gjitha çështjet janë ne përputhshmëri me Ligjin mbi Shërbimin në FSK dhe Rregulloren mbi Rekrutimin për FSK”, thuhet në komunikatë.