Terroristi më i kërkuar i botës, kreu i “Al-Qaedas”, Osama bin Laden, është plakur paksa prejse është parë për herë të fundit në shtatorin e vitit 2007, ka shtuar pak apo hiq peshë gjatë arratisë në malet që rrethojnë kufirin ndërmjet Afganistanit dhe Pakistanit.

Kështu, të paktën, supozohet në fotografinë e punuar nga artistët mjeko-ligjorë të FBI-së, në kohën kur kërkimet e agjencie për njeriun më të rrezikshëm të globit vazhdojnë me fuqinë e plotë.

Fotografitë e punuara në mënyrë digjitale janë publikuar të premten, për t’i treguar publikut se si mund të duket sot njeriu që i planifikoi sulmet terroriste në SHBA në shtator të vitit 2001.

Njëra prej fotografive e paraqet atë të veshur me rrobat tradicionale, ndërsa një tjetër e shfaq atë pa mjekër dhe të veshur në stil perëndimor.

Fotografitë e moshës së shtyrë” janë punuar në kuadër të përpjekjeve më të fundit për të treguar se si të kërkuarit e FBI-së mund të duken në ditët e sotme.

Shpresojmë që këto fotografi ta ndihmojnë dikë që të njohë ndonjë terrorist të dyshuar dhe më pas të kontaktojë me programin Shpërblime për Drejtësi, duke ofruar informacione të cilat do të na çonin deri te vendndodhjet e të kërkuarve”, theksoi Robert Eckert, ndihmësdrejtor i Drejtorisë për shqyrtimin e Informacioneve mbi Kërcënimet e Sigurisë diplomatike dhe Analiza.

Videoja e fundit 30 minutëshe e Osama bin Ladenit e 2007-tës, e cila ishte publikuar pas një mungese më se 3 vjeçare të tij, e paraqiste atë me një mjekër të rregullt, e jo me atë pamjen e zakonshme të shthurur siç zakonisht shihej në videopamjet e 2004-tës. Ai mbante të njëjtin turban të bardhë dhe këmishën e gjatë të bardhë sunite, që i arrinte deri në gjunjë.