Skender Hyseni : Thaçi të raportojë për dialogun

Deputeti i LDK-së Skender Hyseni kërkoi nga kryeministri i Kosovës Hashim Thaçi, që të raportojë për dialogun që po zhvillohet në Bruksel dhe për marrëveshjet e paralajmëruara se do të arrihen javën që vjen.

“LDK është për një dialog përmbajtjesor që do të arrihen zgjidhjet të qëndrueshme që nuk do ta dëmtojnë në asnjë variant karakterin unitar të Kosovës. Po flitet për marrëveshje së shpejti në fushën e gjyqësisë, çfarëdo marrëveshje në këtë fushë kërkon unitaritetin e legjislacionit, unitaritetin e jurisprudencës dhe unitaritetin e gjyqësisë së Kosovës, kjo është thelbësore dhe për të gjitha këto LDK e fton kryeminitrin që në rastin e parë të mundshëm t’i raportojë këtij kuvendi dhe opinionit të gjerë në Kosovë mbi rrjedhat në këtë proces” tha Hyseni.

“Flitet shumë për marrëveshjet që mund të arrihen por të nderuar deputet ju dhe të gjithë ne dimë shumë pak. Dua ta theksoi edhe njëherë që të mos ketë keqinterpretime dhe spekulime të qëndrimit shumë parimor dhe të qartë të LDK-së LDK qëndron fuqishëm për dialog me fqinj me Serbinë, mirëpo LDK mendon se normalizim të plotë të marrëdhënieve me Republikën e Serbisë do të ketë vetëm atëherë kur këto dy shtete pranojnë njëra tjetrën si shtete të pavarura dhe sovrane dhe mbi bazën e njohjes si shtete të pavarura dhe sovrane do të ndërtojmë raporte edhe fqinjësore edhe ndërshtetërore, do të hymë në marrëveshje të llojllojshme dhe të bashkëpunimit në ata pjesë të bashkëpunimit të përgjithshëm rajonal” tha ai.