Skenarët për zgjedhjet e parakohshme parlamentare

Zgjedhjet e parakohshme parlamentare janë pranë miratimit dhe se tashmë miratimi për mbajtjen e tyre vjen nga gjitha partitë në Maqedoni.

Nga partia shqiptare në pushtet BDI (Bashkimi Demokratik për Integrim) tashmë kanë konfirmuar për mbajtjen e zgjedhjeve të parakohshme parlamentare në pako me ato presidenciale. Ndërsa taktizime për këto zgjedhje gjatë kohë janë bërë nga ana e VMRO-DPMNE, e cila akoma vazhdon të mos jetë subjekti bartës për çështjen e zgjedhjeve të parakohshme, edhe pse kjo parti është më e interesuar për to.

Gazeta “Dnevnik” shkruan sot se në BDI ka vendim përfundimtar se duhet mbajtur zgjedhjet e parakohshme parlamentare në pako me ato presidenciale. Dhe se ky qëndrim doli dje edhe përmes liderit të kësaj partie, Ali Ahmeti, pas takimit me ambasadorin sllovak.

Një nga variantet është që BDI të kërkojë shpërbërjen e Parlamentit, ndërsa data e mundshme e këtij vendimi pritet të pasojë më 3 mars. Gjithçka do të ndërmerret pasi që VMRO-DPMNE do të vendos për kandidaturën e saj presidenciale, duke përjashtuar kandidatin koncensual të propozuar si ide nga partia shqiptare e koalicionit.

VMRO-DPMNE në mënyrë indirekte i shmanget pyetjeve se ajo është përgjegjëse për tërë skenarin e mbajtjes së zgjedhjeve, për shkak se vazhdon të shënoj rënie të rejtingut të saj tek elektorati maqedonas dhe se pritja e zgjedhjeve të rregullta më 2015 do të rrezikojë tejmase pozicionin e kësaj partie.  Nga kjo parti zyrtarisht kanë thënë se nuk ka vendim apo qëndrim për zgjedhjet e parakohshme. “Vendimet do të jenë në përputhje me interesat shtetërore dhe nacionale”, kanë theksuar nga kjo parti për mediat maqedonase.

Partitë më të mëdha opozitare LSDM dhe PDSH gjithashtu janë shprehur të gatshme për t`i hyrë garës për zgjedhjet e parakohshme. Këto dy parti kanë theksuar se partitë e koalicionit po vazhdojnë skenaret e tyre për të çuar vendin në zgjedhje të parakohshme parlamentare.

Sipas kodit zgjedhor dhe afateve për mbajtjen e zgjedhjeve të parakohshme parlamentare në pako me ato presidenciale, Parlamenti duhet të  shpërbërhet nga data 27 shkurt deri në 10 ditët e para të muajit mars, ashtu që zgjedhjet e parakohshme të mbahen në raundin e dytë të zgjedhjeve presidenciale. (INA)