PTK në duar të ushtruesve të detyrës

Ushtruesit e detyrës së menaxherëve me shumë gjasë do ta kenë fatin ta udhëheqin Postë Telekomin e Kosovës (PTK) deri në privatizimin e kësaj të fundit, që pritet të ndodhë këtë vit.

Pothuajse të gjithë menaxherët kryesorë të kompanisë më profitabile në vend janë ushtrues të detyrës.

Ushtrues detyre janë edhe anëtarët aktualë të Bordit të Drejtorëve të PTK-së, të cilëve tashmë qeveria ua ka shpallur konkursin.

I pari i Postë Telekomit të Kosovës, Nuredin Krasniqi, është ushtrues detyre i kryeshefit ekzekutiv. Para se të emërohej në këtë pozitë, Krasniqi ka qenë menaxher kryesor i financave në këtë kompani.

Pas kalimit të Krasniqit në pozitën e kryeshefi t ekzekutiv, në pozitën e ushtruesit të detyrës së menaxherit kryesor të financave është emëruar Arben Halili. Pozita e sekretarit të korporatës është plotësuar me ushtruesin e detyrës, Elvis Pistën, i cili më herët ka qenë menaxher për çështje legale, ndërsa ushtrues detyre i auditorit të brendshëm të kompanisë është caktuar Gëzim Pajaziti.

Edhe njësia më profitabile e PTK-së, “Vala” vazhdon të udhëhiqet nga ushtruesi i detyrës

së drejtorit, Bedri Baraku. Njësia e telekomit udhëhiqet nga ushtruesi i detyrës, Isa Smajlaj dhe njësia e Postës udhëhiqet nga ushtruesi i detyrës së drejtorit, Rafet Jashari.

Jashari për disa vjet ka qenë në krye të Postës së Kosovës, mirëpo është shkarkuar nga kjo pozitë nga ish-kryeshefi ekzekutiv i PTK-së, Shyqyri Haxha. Pas përfundimit të mandatit të Haxhës, ushtruesi i detyrës së kryeshefi t të PTK-së, Nuredin Krasniqi, e ka rikthyer Jasharin në detyrën e u.d të drejtorit të Postës, në vend të Blerim Krasniqit.

Edhe për drejtuesit e Bordit të PTK-së, Qeveria e Kosovës, e cila është aksionar e kësaj kompanie publike, ditë më parë ka shpallur konkursin për zgjedhjen e anëtarëve të rinj.

Kreu aktual i Bordit të Drejtorëve, Rexhë Gjonbalaj, është nën hetime të Misionit Evropian për Sundim të Ligjit (EULEX) në lidhje me kontratën e PTK-së për operator mobil virtual ”Dardaphone.net”, pronë e kompanisë “Devolli Group”.

Për këtë kontratë nën hetime është edhe ish-kryeshefi ekzekutiv i PTK-së, Shyqri Haxha, vëllezërit Blerim dhe Shkëlqim Devolli dhe Ismet Bojku nga “Devolli Group”.

Zëdhënësi i PTK-së, Menduh Abazi, thotë për “Zërin” se si korporata më e madhe në vend, PTK nuk ka asnjë mangësi në udhëheqjen e saj për shkak se në proces e sipër është përzgjedhja e zyrtarëve më të lartë me anë të konkurseve publike.

“Procesi i përzgjedhjes se drejtorëve te njësive do të bëhet posa të përfundojë procesi i përzgjedhjes me konkurs publik i tri pozitave më të larta në kompani. I gjithë ky proces është transparent, i rregullt dhe konform ligjeve ne fuqi dhe çdo përpjekje për ta interpretuar ndryshe nuk përkon me realitetin faktik dhe ligjor”, shprehet Abazi.

Ushtruesit e detyrës së menaxherëve

Nuredin Krasniqi, u.d i kryeshefit ekzekutiv

Arben Halili, u.d i menaxherit kryesor të Financave

Bedri Baraku, u.d i drejtorit të Valës

Isa Smajlaj, u.d i drejtorit të Telekomit

Rafet Jashari, u.d i drejtorit të Postës

Elvis Pista, u.d i detyrës së sekretarit të korporatës

Gëzim Pajaziti, u.d auditorit të brendshëm të PTK

Ushtruesit e detyrës në bord

Rexhë Gjonbalaj, kryetar

Nuhi Ahmeti, anëtar

Elmaze Pireva, anëtare

Sahit Surbulli, anëtar

Qamil Buzhala, anëtar

Gani Sylaj, anëtar