Malevski: S’është dashur t’i jepej fjala Topallit në Parlament

Ish-ministri i Punëve të Jashtme i Maqedonisë, Denko Malevski ka theksuar se nuk është dashur t’i jepet fjala në Parlament kryetares së Kuvendit të Shqipërisë, Jozefina Topalli.

“Të gjithë e mbajnë mend fjalimin e kryeministrit izraelit Netanjahu në Kongresin amerikan, por këto janë momente specifike dhe produkt i disa rrethanave politike. Duhet të kemi kujdes se cilit ia hapim dyert e Parlamentit. Kur të lejoni dikush të mbajë fjalim është mjaft e rrezikshme që mos të dini se çfarë mund të flitet. Ata patjetër duhet të jenë burrështetas të mëdhenj me vizione të qarta, e jo kështu siç ndodhi”, tha Malevski, transmeton “Kapital”, duke shtuar se nuk kujtohet se ndonjë funksionarë i Maqedonisë ka mbajtur fjalim në ndonjë parlament të huaj.

Ndryshe, Jozefina Topalli mes të tjerash në fjalimin e mbajtur në Kuvendin e Maqedonisë kishte thënë se Shkupin të parët e kanë çliruar shqiptarët me mbi 10 mijë ushtarë.

Kishin reaguar historianët maqedonas, por atyre iu është përgjigjur kryetari i Shoqatës së Historianëve Shqiptarë të Maqedonisë, Skender Hasani, i cili ka publikuar dokumente të kohës të cilat qartë pohojnë se Dervish Cara me mbi 10 mijë ushtarë e kishte çliruar i pari qytetin e Shkupit.