Një bebe e cila luan ping-pong është bërë sensacion në YouTube pasi mahniti shikuesit me shkathtësitë e veta për të luajtur këtë sport në një moshë kaq të re.

Fëmija i mrekullueshëm Jamie me reket në dorën e majtë kthen të gjitha gjuajtjet top pas topi derisa qëndron i ulur në tavolinën e ping-pongut.

Meritor për këtë është edhe babai dhe njëherësh trajneri i tij i cili e përgatit djalin në këtë moshë kaq të re.

www.youtube.com/watch?v=1n5uFGk2pnc

Japonezi Takeru Kobayashi arriti të hajë 337 krahë pule për kohën rekorde prej 30 minutash. Ai e fitoi shpërblimin prej 20.000 dollarëve në garën “Wing Bowl XX” që u mbajt në Filadelfia.

Sipas agjencisë së lajmeve AP, rreth 20 veta, shumica e të cilëve hëngrën krahë pule, morën pjesë në këtë manifestim.

Rekordin paraprak prej 225 krahëve e mbante amerikani Jonathan Skwib.

Presidenti amerikan, Barack Obama u kërkoi të premten kundërshtarëve të tij republikanë në Kongres të mos pengojnë rimëkëmbjen ekonomike dhe të miratojnë masat rimëkëmbjes që ka propozuar, pas publikimit të shifrave të papunësisë në ulje.

“Mos ngadalësoni rimëkëmbjen ekonomike që ne po përjetojmë, mos e pengoni”, tha Obama.

Përqindja zyrtare e papunësisë ka rënë në nivelin më të ulët në tre vjet në SHBA në sajë të përshpejtimit të angazhimeve duke vendosur në 8,3 për qind në muajin janar kundër 8, për qind në muajin dhjetor 2011, sipas raportit mujor mbi punësimin nga departamenti i Punës.

Ministri i Financave, Bedri Hamza dhe ekonomistët kosovar janë konfrontuar rreth situatës ekonomike në vend. Në debatin për krizën të organizuar STRAS, ministri Hamza tha se Kosova s’ka krizë, ndërsa ekonomistët thanë të kundërtën.

Ministri i Financave të Kosovës, Bedri Hamza, nuk e pëlqen të thuhet se në Kosovë ka krizë. Madje edhe ato pak telashe që i përmend, me të cilat ballafaqohet vendi, thotë se janë të trashëguara.

“Unë kisha thanë që Kosova as nuk është në krizë as nuk është afër krizës, por kjo nuk do të thotë që Kosova nuk ka vështirësi edhe nuk ka probleme. Shumica e problemeve, me të cilat ballafaqohet Kosova, janë probleme të trashëguara, janë probleme të trashëguara nga e kaluara dhe përmirësimi i situatës ekonomike e di që nuk është i lehtë dhe nuk duhet të flitet se mund të ndodhë brenda natës”, ka pohuar Hamza.

Këto komente ai i bëri të premten gjatë një debati me temën “Kosova në krizë, apo afër krizës”, i organizuar nga Qendra për Hulumtime Strategjike dhe Sociale “STRAS”.

Për drejtorin e kësaj qendre, Ibrahim Rexhepi, ishte shumë optimiste deklarata e ministrit se Kosova kishte arritur rritje të hovshme ekonomike dhe ishte larg krizave që e kanë prekur Evropën. Në studimin e tij mbi sektorin financiar edhe ai ka vlerësuar se ndikimi nga këto vende është minimal. “Varshmëria nga tregjet e jashtme është shumë e vogël dhe nuk kemi banka me kapital nga vendet e prekura nga kriza e eurozonës”, theksoi ai, duke thënë se përjashtim në këtë rast bën Trusti i Kursimeve Pensionale të Kosovës.

Ndryshe nga numri një i financave në vend, kryetrari i Odës Ekonomike të Kosovës, Safet Gërxhaliu, pati një mendim më kritik. Ai tha se kalkulimet e ministrit nuk përkojnë me realitetin dhe, sipas tij, do t’i gëzohej faktit nëse ato janë ashtu.

“E dëgjova elaborimin edhe të ministrit, po edhe të zotëri Havollit dhe për një moment me lindi pyetja ta pyes vetën ‘vallë a jemi pjesë e gëzimit të të gjitha këtyre fryteve që po ndodhin në Kosovë”, theksoi Gërgjaliu.

Sipas tij, të dhënat që ai posedon dhe kalkulimet e tregojnë një realitet tjetër. Për këtë ai vlerëson se nuk është mirë që të humbet kohë në kërkim të arsyes për këtë situatë sesa të gjinden rrugë për të dalë nga një situatë e tillë.

Temperaturat jashtëzakonisht të ulëta kanë vështirësuar prodhimin e energjisë elektrike, duke ngrirë pajisjet për prodhim të energjisë në Kosovën B. Gjithashtu të ftohtit ka ngrirë thëngjillin dhe shiritat transportues. Drejtuesit e Korporatës apelojnë tek qytetarët të gjejnë zgjidhje.

Në luftë me akullin e acarin, punëtorët me helmeta të verdha mundohen t’i mbajnë gjallë tymtarët e fundit. Është kjo pamja në ambientet e Korporatës Energjetike të Kosovës në dy ditët e fundit, që ngjan me ato të filmit “Day after Tomorrow”, i cili përshkruan se si ngrinë gjithçka nga i ftohti në tokë.

Edhe në KEK pothuajse ka ngrirë gjithçka si pasojë e motit, me acar ekstrem dhe reshjeve të mëdha te borës, që nuk mbahet mend gjatë 3 dekadave të fundit.

Kushtet ekstreme atmosferike, kanë vështirësuar prodhimin e energjisë elektrike pasi kanë ngrirë pajisjet dhe kanë dal nga funksioni dy njësi të Termocentralit Kosova B.

Aktualisht thuhet se po prodhohen 900 MW energji, ndërsa ngarkesa kërkesa për energji këto ditë shkon deri ne 1300 MW. Kjo rezulton me nevojë të importit rreth 400 MË, për kushtet optimale të punës së blloqeve, por sipas zyrtarëve të KRK-ut as nga importi nuk po ka energji. Në të njëjtën situatë thonë se janë edhe vendet e rajonit të cilat po përballen me kushte të rënda atmosferike.

Në KEK tregojnë se problemet kryesore që u ka shkaktuar ai ftohti rezultojnë tek hinkat, rrëshqitja e shiritave transportues, thyerja e shiritit transportues të qymyrit që furnizon njësinë A4, ndërsa ekskavatorët e djerrinës nuk kanë mundur të punojnë prej mbrëmjes të së enjtes si pasojë e ngricave.

Drejtori menaxhues i korporatës, Arben Gjukaj pohon se punëtorët po ndezin zjarre edhe brenda objekteve për ti mbajtur stabilimentet të pa ngrira.

“Pajisjet e ngrira vazhdimisht janë shkrirë, janë rikthyer dhe po rikthehen vazhdimisht në punë fale përkushtimit maksimal të punëtorëve 24 orë në ditë, por kushtet atmosferike kanë bërë të veten. Sido qe te jete, punëtorët nuk janë dorëzuar dhe po vazhdojnë të luftojnë me motin e lig”, ka thënë Gjukaj.

Sipas tij, kushtet atmosferike të ngjashme kanë mbizotëruar në dimrin 1984/85. Në atë kohë kishin vështirësuar prodhimin e energjisë elektrike në TC Kosova B edhe pse ajo në atë kohë ishte në gjendje të përkryer të punës, menjëherë pas komisionimit duke shkaktuar trembëdhjetë rënie të blloqeve të TCB, të cilat kanë qenë deri 8 ditë jashtë pune. Për shkak të gjendjes së vështirësuar, që nga e enjtja, KEK-u ka shpallur gjendje të jashtëzakonshme dhe të gjithë punëtorët e korporatës në të gjitha divizionet janë në gatishmëri gjatë 24 orëve. Punëtoret që janë të angazhuar në pikat me kritike të operimeve janë të obliguar të raportojnë çdo dy orë mbi gjendjen e pajisjeve dhe objekteve të tyre.

Ai ka bërë apel tek konsumatorët që në rrethanat e krijuara për shkaqe natyrore, të bëjnë kursim maksimal të energjisë elektrike.

Ndërkaq, drejtori i KOSTT-it, Fadil Ismajli, ka thënë se po qëndrojnë në gjendje gatishmërie për çdo eventualitet në sistemin e transmisionit. Sipas tij, linjat e transmisionit janë në rregull deri më tani por nuk ka përjashtuar mundësinë që të ndodhë ndonjë telash për shkak të situatës së krijuar.

4504 prona! Kaq është numri i ndërtimeve pa leje që kanë përfituar nga procesi i legalizimeve deri më sot nga mbi 270 mijë që kanë aplikuar për legalizim. Këto janë të dhënat e paraqitura nga një raport i Bankës Botërore i publikuar së fundmi, ku përdorimi i fjalës “korrupsion” është aq i shumtë, sa bie paksa ndesh me politikën e zakonshme të korrektesës diplomatike që përdorin institucionet ndërkombëtare.

Raporti, i publikuar për të dytën ditë rresht në gazetën “Shqip”, vëren se Agjencia e Legalizimit, Urbanizimit dhe Integrimit të Zonave të Ndërtimeve Informale ose ALUIZNI, ka marrë burime të bollshme financiare që paguhen nga taksapaguesit, por procesi ka ecur tejet ngadalë në raport me koston e kësaj ngrehine institucionale.

Njëra anë e dështimit i dedikohet mungesës së parave. Kur dikush premton tokë falas, vështirë se kjo mund të rezultojë e vërtetë. Por një pjesë tjetër e dështimit duket se nuk ka lidhje me paratë.

Rreth një e treta e ndërtimeve pa leje, sipas raportit të Bankës Botërore, janë ndërtime pa leje në pronë të vet dhe në një rast të tillë, nuk ka kosto kompensimi. Megjithatë, procesi nuk ecën.

“Procesi i legalizimit ka ecur ngadalë përkundër burimeve që i janë kushtuar. ALUIZNI është një organizatë e madhe dhe e pajisur mirë me burime, kostot operative të së cilës i mbulon buxheti i shtetit”, thotë raporti. Megjithatë, vetëm 4500 subjekte në 270 mijë të tilla ose vetëm 1.7 për qind e aplikantëve kanë mbaruar punë.

Ekonomia amerikane ka krijuar 243 mijë vende të reja pune në dhjetor të 2011, duke regjistruar rënie të nivelit të përgjithshëm të papunësisë për të shtatin muaj radhazi.

Analistët kishin parashikuar një shtesë prej 150 mijë vendesh, prandaj shifrat janë dukshëm mbi pritshmëritë dhe tregojnë për një rimëkëmbje më të shpejtë se parashikimet të ekonomisë më të madhe në botë, pas krizës që e përfshiu në vitet 2008-09.
Në total, papunësia llogaritet tashmë në 8.3 për qind , shifra më e ulët e tre viteve të fundit dhe e përmirësuar me 0.2 për qind në krahasim me nëntorin.

Në tre muajt e fundit, ekonomia amerikane ka qenë në gjendje të krijojë mesatarisht 201 mijë vende pune në muaj. Shifrat inkurajuese vijnë në një kohë kur ekonomi të tjera të mëdha brenda Eurozonës dhe Japonia, janë duke u kërcënuar nga rreziku i recensionit.

Amerika duhet të tregojë më shumë mirëkuptim dhe dashamirësi për pikëpamjet e Serbisë rreth Kosovës, sepse me politikën e saj aktuale mund ta largojnë Serbinë në anën tjetër, ka thënë zëvendëskryeministri i Serbisë, Ivica Dacic.

“Amerika e ka një parim që merr parasysh situatën në terren, por nuk mundet përgjithmonë ta mbajë kokën në rërë duke pas parasysh vetëm gjendjen aktuale në terren. Situata në terren është e tillë që problemi nuk është zgjidhur dhe tash momenti kyç nëse administrata amerikane do që të ketë ndjesi për gjërat e drejta për të cilat flet pala serbe”, ka thënë Dacic në Washington.

“Paramendojeni situatën në Serbi në të cilën tashmë ka rënë mbështetja për BE-në nën 50 për qind, e shteti vendosë se nuk do që të futet në BE, por që të afrohet me Rusinë”, shton Dacic, duke pyetur se cili do të ishte interesi amerikan që Rusia në një moment vendosë të instalojë në Serbi mburoja të raketave.

“E pra, a ka Amerika interes të lartë apo të ulët dhe a është ky interesi më i lartë i Amerikës? Rreth këtyre gjërave askush nuk po mendon”.

Moti i ligë dhe acari i ditëve të fundit shtyu Avokatin e Popullit t’i vizitojë banorët e barakave te Fusha e Pajtimit në Prishtinë. Mbeti i tmerruar nga ajo çfarë pa, prandaj kërkoi nga institucionet që ta mbyllin kampin. Vizitën e Kurteshit e vlerësuan shumë ata që jetojnë në baraka. Të lodhur nga i ftohti, ata rrëfeheshin para tij për çdo hall që kishin. Madje disa shpresonin edhe për ndihmë.

I erdhi dita të cilën po e priste tash e sa kohë. Është pikërisht ky moment, për të cilën Zaha Rexhepi i lutej Zotit çdo natë. Kështu ajo të premten mezi priti orën 11 e 30, kohën kur Avokati i Popullit, Sami Kurteshi, paralajmëroi se do ta vizitojë atë bashkë me gjashtëmbëdhjetë familje tjera, që jetojnë në barakat e Fushës së Pajtimit në Prishtinë.

E përgatitur për t’ia treguar të gjitha hallet e saj, Zaha vazhdimisht vëzhgonte nga dritarja. Po priste makinën e avokatit, për të cilën u gëzua shumë kur arriti. E derisa ndodhej në pritje, të njëjtat shqetësime të cilat kishte bërë plan t’ia rrëfente Sami Kurteshit, i tregoi edhe Express’it. “E kam ëndërruar këtë ditë, mezi nuk e prita këtë moment, pasi besoj se vizita e avokatit do të sjellë pak shpresë për ne”, tregon Zaha, derisa grushtonte duart nga i ftohti që mbretëronte në barakën e saj.

“Mendoj se fjalët e mia nuk kanë shumë rëndësi, pasi avokati ka mundësinë që ta sheh vetë dhomën ku unë jetoj. Me fakte do të bindet se si e kalojmë këtë dimër të ftohte”, pohon Zaha.

Në atë kontjenjer, në Fushën e Pajtimit, Zaha jeton vetëm me djalin e saj 9 vjeçar.

Ka 10 vite që ajo rrit këtë fëmijë aty. Por, për këtë nënë ky dimër ka qenë njëri ndër dimrat më të vështirë, i cili ia ka vështirësuar jetën asaj në atë barakë. “Komuna këtë vit na ka dhënë vetëm nga një metër dru. Dimri ka marrë i tmerrshëm, nuk e di se si do t’ia dal ta kaloj të ftohtit”, flet e shqetësuar Zaha.

E për t’ia vështirësuar më shumë jetën ishte një premtim që i është dhënë kësaj nëna kohë më parë nga Komuna e Prishtinës. Kur kjo komunë vendosi t’i ndajë banesat që ka ndërtuar shumë afër barakave, Zaha ishte në listë. Por, kur banesat u ndanë, ajo thotë se komuna e ka heq emrin e saj nga ajo listë. “Mezi nuk e prisja ditën që të shpërngulem. Madje nisa edhe t’i paketoj gjërat për t’i dërguar pastaj në banesë. Por, krejt këto ishin të kota”, pohon Zaha, derisa thotë se përveç që nuk iu dha banesa, komuna as që e ka njoftuar atë për këtë punë. “Ata që morën banesat komuna i ka njoftuar në telefon. Mua kurrë nuk m’u dha një shpjegim, pse më hoqën nga lista”, thotë kjo grua.

Të gjitha këto probleme, përveç gazetës, Zaha ia rrëfeu edhe avokatit të popullit Sami Kurteshi, i cili të premten ndodhej për vizitë tek ajo. Përveç kësaj nëne, Kurteshi vizitoi edhe familjet e tjera, që jetojnë në po të njëjtat kushte sikurse Zaha. Nga ajo që pa mbeti i tronditur. Asnjëra nga barakat, të cilat ai i vizitoi, nuk kishte rrymë, ujë, madje as nuk ishte ngrohtë brenda tyre.

Kjo gjendje shtyri Kurteshin të kërkojë nga institucionet e Kosovës ta mbyllin kampin ku jetojnë gjithsej 17 familjet kosovare. “Gjendja e këtyre banorëve është e mjerueshme, janë kushte jonjerëzore, që e lëndojnë jo vetëm dinjitetin e banorëve këto, po shoqërisë në përgjithësi”, ka thënë Kurteshi, derisa vizitonte të gjitha familjet me rend, e tek të cilat dëgjonte lloj-lloj hallesh. “Kush e sheh këtë gjendje nuk e di se si mund të rrijë i qetë. Prandaj u bëj ftesë publike institucioneve që ta mbyllin kampin e këta banorë t’i sistemojnë dika”, vlerëson Kurteshi. Sipas tij, përveç shkeljeve të të drejtave të njeriut, banorëve të Fushës së Pajtimit u është shkelur edhe dinjiteti njerëzor. “Një njeri që nuk jeton në mënyrë të dinjitetshme, ai nuk e gëzon asnjë të drejtë të njeriut. E banorët këtu jetojnë në mjerim”, tha ai.

Gjykimi në rastin “Bllaca II” pezullohet ende pa filluar. Ky pezullim është bërë pas kërkesës së palës mbrojtëse për ta përjashtuar nga ky rast kryetarin e trupit gjykues Torre Tomasson. Në arsyetimin e mbrojtjes thuhet se i njëjti gjyqtar ka qenë anëtar i panelit edhe në rastin e parë të gjykimit të Fahredin Gashit, ku Nazim Bllaca ka qenë dhe është dëshmitar bashkëpunues dhe kjo nuk lejohet me ligj.

Edhe ky vit do të jetë i ngjeshur për Fahredin Gashin, i dënuar me 18 vjet burg për vrasjen e Salih Gashit. Atij edhe sivjet do t’i bie shpesh që nga Dubrava ta sjellin me duar të lidhura në ndërtesën e Gjykatës së Qarkut në Prishtinë.

Një proces tjetër filloi në Prishtinë e ku i akuzuar është edhe Fahredin Gashi. E dëshmitar kryesor edhe në këtë proces është ish-shoku i tij Nazim Bllaca. Kësaj radhe Fahredin Gashi nuk është vetëm. Bashkë me të janë edhe pesë shokët që Nazim Bllaca shpesh i ka quajtur “klani i vrasjeve”. E njeriu që dikur e kishin shok dhe kishte deklaruar se ishe pjesë e këtij klani edhe në këtë proces është dëshmitari kryesor.

Nazim Bllaca ka deklaruar edhe publikisht se si anëtar i SHIK-ut së bashku me të akuzuarit kanë vrarë Ibush Kllokoqin si dhe kanë tentuar të vrasin Adem Salihajn, ish kryetarin e Ferizajt, dhe një person tjetër me emrin Ismet Arifi. Bashkë me Fahredin Gashin në këtë proces akuzohen edhe Shaban Syla, Bekim Syla, Driton Hajdari, Shpresim Uka dhe Sadik Abazi. Të premten ishte paraparë të fillonte seanca e parë e procesit “Bllaca 2”, por ajo u ndërpre sepse mbrojtja kontestoi përbërjen e trupit gjykues.

Avokati i të akuzuarit Sadik Abazi ishte i pari që kërkoi përjashtimin e kryetarit të trupit gjykues Torre Tomason, pasi që, sipas tij, ai ka qenë anëtar i panelit në gjykimin ndaj Fahredin Gashit.

Në procesin gjyqësor kundër Gashit, i njohur si “Bllaca 1”, kolegji e kishte shpallur të pandehurin fajtor për krime lufte kundër popullatës civile dhe i kishte shqiptuar dënimin prej 18 vjetësh burgim. Një ndër arsyet e shpalljes fajtor dhe të dënimit të Fahredin Gashit ishte edhe dëshmia e dëshmitarit bashkëpunues Nazim Bllaca.

“Paanshmëria është vënë në pikëpyetje sepse ju kryetar keni qenë anëtar i panelit në rastin e një procesi tjetër, ku është dënuar Fahredin Gashi, i akuzuar edhe në këtë proces.

Si anëtar i trupit gjykues keni qenë pjesëtar i atij paneli që keni vendos t’u besoni provave të dëshmitarit kryesor e që është dëshmitar kryesor edhe në këtë proces”, tha avokati Millaku. Duke u nisur nga ajo që gjykatësi kishte marrë pjesë në vendimin për pranimin e dëshmisë së Nazim Bllacës si të vërtetë në gjykimin kundër Fahredin Gashit, avokati Millaku konsideroi se gjykatësi nuk do të jetë i paanshëm, kjo pasi që edhe në këtë proces Nazim Bllaca ishte dëshmitari kryesor.

Njëjtë mendon edhe avokati i Fahredin Gashit. Tahir Rrecaj tha se aktgjykimi është mbështetë tërësisht në dëshminë e dëshmitarit bashkëpunues Nazim Bllaca.

“Mbi këtë dëshmi e keni marrë vendimin për dënim e që për neve ato dëshmi janë të pabesueshme dhe të papranueshme. Si anëtar i Trupit Gjykues ne kemi paragjykime se i besoni atij dëshmitari që është dëshmitar edhe në këtë proces”, tha Rrecaj.

Ky fakt sipas Rrecajt i bën që të besojnë se do të shkelej parimi i paanshmërisë.

“Nëse atëherë dëshmitë i keni pranuar si të besueshme njëjta do të përsëritet edhe në këtë proces”, tha Rrecaj. Kërkesa e Millakut u mbështet edhe nga të gjithë avokatët e të akuzuarve tjerë. Mirëpo prokurori i rastit Mauricio Salustro ia tërhoqi vërejtjën Trupit Gjykues se as që duhet të diskutojnë për përjashtim të kryetarit ose jo pasi që një kompetencë e tillë i takon kryetarit të gjyqtarëve të EULEX-it.

Mirëpo mbrojtja i rikujtoi Salustros dhe anëtarëve të panelit se kjo është e rregulluar me Ligjin për Procedurë Penale të Kosovës. Në një nen të këtij ligji thuhet se nëse një gjykatës ka qenë anëtar ose gjykatës i ndonjë procesi gjyqësor që është në procedurë të ankesës detyrohet ta ndërprejë seancën. Pas kontestimeve të mbrojtjes kolegji i gjykatave u konsultua dhe mori aktvendim që të ndërpritet seanca për të vendosur Presidenti i Asamblesë së Gjykatësve të EULEX-it, lidhur me kryetarin e kolegjit. Kolegji ju dha kohë palëve që për kërkesa të tjera t’i drejtohen me shkrim Presidentit të Asamblesë së Gjykatësve të EULEX-it dhe atë deri të hënën pasdite. Seanca e radhës në këtë çështje ishte caktuar për 27 shkurt në ora 10 dhe kolegji nuk e ndryshoi atë, meqë ka kohë të mjaftueshme për vendimin nga kryetari i asamblesë së gjyqtarëve.

Dëshmitari “X” në ditarin e vet ka shkruar se misioni i EULEX-it është mbi ligjin. Po ashtu, ai ka shkruar edhe për një “padi” kundër prokurorit Maurizio Salustro.

“Dëshmi ose padi 29.12.2010. Këtë padi po e bëj me shkrim kundër prokurorit italian Mauricio dhe dy agjentëve të sigurimit për mbrojtjen e dëshmitarit, shefi Donalld nga Britania dhe Hansi nga Gjermania. Zotëri prokuror, hetues-Prishtinë, ti më bëre jo krim, por masakër psikike në tërë fëmijët dhe gruan time. Por, ti mua s’mund të më blesh kurrë për një milion euro të juaja dhe burgun që ma falni çka kam bërë, apo për disa dëshmi që t’i kam nënshkruar pa mi përkthyer”, ka shkruar në ditarin e vet dëshmitari “X”, transmeton “Epoka e Re”.

Dëshmitari “X” në ditar tregon se disa herë është marrë në pyetje nga prokurori Salustro dhe për këtë i ka shkruar datat nëpërmjet një tabele.

“Nënshkrova pa ditur se çka shkruhet në to, nuk mu përkthyen. Ka mundësi me qenë edhe data të tjera, por me këto i kam nënshkruar pa mi përkthyer fare. Kam dhënë dëshmi dëshmi në podrumin e I. Bajraktari në Taukbaqe në Prishtinë dhe i sëmurë prej plagëve”, shkruhet në dituar, duke treguar se pyetjet që i janë bërë kanë qenë jashtë normave ligjore.

“Këto pyetjen kanë qenë jashtë normave ligjore. EULEX-i është vetë mbi ligjin”.

Po ashtu, dëshmitari “X” shkruan në ditarin e vet për presionin që ka pasur kur e kanë strehuar në Maqedoni.

“Më quat në Maqedoni për tri javë, u bënë tre muaj. Ma ndërruat emrin dhe mbiemrin, pasaportën Azem Bytyqi, e na latë pa asnjë dokument, që nëse vritna mos me u dit nga jam, por s’mund e bëtë këtë”, ka shkruar “X”.

“Unë po ju them se të gjitha deklaratat e mia që gjenden para teje janë të pavlerë. Fëmija i dëshmojnë të vetat se çka kanë vujt. Këtë përgjegjësinë time, që më shtyre të ndahem nga familja dhe jeta ime me një presion të papërballueshëm, janë këta Mauricio prokurori, Donalldi, Hansi, psikologu Orhani”.

Dëshmitari “X” ka shkruar se ditarin e vet edhe për ditët që i ka kaluar në Gjermani te vëllezërit e vet. Ndërsa, e ka akuzuar misionin e EULEX-it se ka shkelur marrëveshjet me të kur ka qenë pyetja për t’ia siguruar banimin në Gjermani.

“Nëse i dal ndonjë automjeti përpara ju lus me i kërku falje dhe të jetë i lirë edhe nga ana ligjore. Përgjegjësinë e marrtë EULEX-i në krye me prokurorin Mauricio dhe bosi i sigurimit Donalldi”, ka shkruar në ditarin e vet dëshmitari “X”.

Qeveria do ta respektojë me përpikëri Kushtetutën e Republikës së Kosovës, ligjet e Kosovës, dhe dokumentin e presidentit Ahtisari.

Dhe, e heq gjithë atë mjegull apo pretendim zhurmues elektoral politik se diçka e tillë nuk do të lejohet të ndodhë, diçka e tillë as që është propozuar, por, çdo zgjidhje që Prishtina do ta pranojë edhe në të ardhmen, do të jetë zgjidhje në përputhshmëri të plotë me vullnetin qytetar të Kosovës, duke respektuar Kushtetutën e Kosovës dhe modelin evropian. Tek e fundit, them të drejtën, sa i përket deklarimeve të lira që po dalin aty – këtu, mund t’ju them lirisht se edhe krejt spektri politik po të pranonte heqjen e Republikës, unë nuk e pranoj - ka thënë kryeministri i Republikës së Kosovës, Hashim Thaçi, në intervistën dhënë Radios Evropa e Lirë

RADIO EVROPA E LIRË
Zoti kryeministër, cila është e ardhmja e veriut të Kosovës? Tashmë është kërkuar nga qeveria juaj një plan i veçantë për veriun. Çka nënkupton kjo? Një status special?

HASHIM THAÇI
E ardhmja edhe e veriut të Mitrovicës është e ardhmja identike me shtetin sovran të Kosovës. E ardhmja e veriut është e ardhmja e Kosovës, duke respektuar gjithmonë Kushtetutën dhe ligjet e Kosovës; duke respektuar dokumentin e presidentit Ahtisari, prandaj në asnjë rrethanë nuk do të ketë as status special, as ndonjë propozim që lexohet në ndonjë medium, dhe një gjë e tillë asnjëherë nuk është shtruar së diskutuari, e lëre së propozuari nga ndokush.

Pra, veriu i Mitrovicës është pjesë e Kosovës. Kosova do të funksionojë si një njësi shtetërore, me integritetin territorial të respektuar e garantuar e të njohur edhe ndërkombëtarisht.

RADIO EVROPA E LIRË
Ju e hidhni poshtë këtë mundësi, por realiteti në terren në veri dëshmon se atje nuk ka pajtim me planin e Ahtisarit dhe pavarësinë e Kosovës. Me çka do të bindni serbët që të ndryshojnë qëndrim?

HASHIM THAÇI
Qeveria e Republikës së Kosovës dhe gjithë mekanizmat ndërkombëtarë që janë të instaluar në Kosovë do të vazhdojnë të punojnë që të jenë sa më afër qytetarëve në veri, në mënyrë që edhe ata të kuptojnë realitetin e ri të krijuar. Dokumenti i presidentit Ahtisari është dokumenti më afirmativ për komunitet në Evropë.

Edhe e ardhmja e qytetarëve serbë, edhe e të tjerëve në veri, është duke u integruar në institucionet e Kosovës. Unë kam vazhduar të kem kontakte edhe direkt, por edhe përmes mekanizmave të tjerë, me njerëz me ndikim në veri përmes OJQ-ve të ndryshme, apo personaliteteve të ndryshme me ndikim në opinionin publik atje.

Gjërat kam besim që do të fillojnë të ndryshojnë për të mirë dhe ne do të vazhdojmë me angazhimin tonë konkret që të kemi rend dhe ligj, që të kemi investime socio-ekonomike, të kemi demokraci, zgjedhje të lira, lidership legjitim dhe të vazhdojmë me përkushtimet tona mbështetëse integruese dhe zhvillimore për veriun.

Realisht për vitet të tëra aty nuk ka pasur rend dhe ligj, tani për herë të parë pas 12 vjetësh, nga 25 korriku, kemi doganierët dhe policët e Kosovës. E rëndësishme është që tash kemi kontrolle kufitare nga institucionet e Kosovës dhe ato ndërkombëtare. Tani, natyrisht se kërkohet ky kontakt me qytetarët në veri që të sqarojmë përgjegjësitë tona shtetërore para tyre, që ata qytetarë të jetojnë në Kosovën e pavarur dhe sovrane, të jetojnë të lirë dhe me të drejta të garantuara. Ata janë qytetarë, shtetas tanë, dhe ne do të jemi pranë tyre me ofertat tona afirmative integruese.
RADIO EVROPA E LIRË
Jeni shprehur në favor të takimit me presidentin serb Boris Tadiq. Në çfarë rrethanash do të mbahej një takim i këtillë dhe për çfarë do të bisedonit?

HASHIM THAÇI
Realisht, kjo nuk është hera e parë e deklarimeve të tilla. Është e nevojshme, është e domosdoshme për interesin e dy shteteve, dy popujve tanë, të paqes, të stabilitetit, bashkëpunimit rajonal, të ketë takime të liderëve politikë të zgjedhur në mënyrë legjitime të shteteve përkatëse.

Takime të delegacionit kosovar ka pasur edhe në Vjenë edhe në vende të tjera. Prandaj në interesin e dy vendeve tona, është që të ketë edhe komunikim të drejtpërdrejt ndërshtetëror në mes të lidershipit kosovar edhe atij të zgjedhur të Serbisë, por gjithmonë si dy shtete të pavarura sovrane, duke punuar për interesin e dy vendeve, qytetarëve tanë dhe perspektivës euro-atlantike, edhe të Kosovës edhe të Serbisë edhe të gjithë rajonit.

RADIO EVROPA E LIRË
Përfaqësimi i Kosovës në forumet rajonale ka bërë që të ngecin edhe përpjekjet për rifillimin e bisedimeve. A janë vënë në pikëpyetje këto bisedime duke pasur parasysh qëndrimet tërësisht të kundërta të të dyja palëve?

HASHIM THAÇI
Prishtina do të vazhdojë të jetë kreative dhe e përgjegjshme në procesin e dialogut ndërshtetëror mes Kosovës dhe Serbisë për çështje teknike në interesin e gjithë qytetarëve, pa dallime etnike. Ndërsa sa i përket zhurmës së ditëve të fundit, deklaroj shumë qartë se Qeveria e Republikës së Kosovës do ta respektojë me përpikëri Kushtetutën e Republikës së Kosovës, ligjet e Kosovës, dhe dokumentin e presidentit Ahtisari.

Dhe, e heq gjithë atë mjegull apo pretendim zhurmues elektoral politik se diçka e tillë nuk do të lejohet të ndodhë, diçka e tillë as që është propozuar, por, çdo zgjidhje që Prishtina do ta pranojë edhe në të ardhmen, do të jetë zgjidhje në përputhshmëri të plotë me vullnetin qytetar të Kosovës, duke respektuar Kushtetutën e Kosovës dhe modelin evropian.

Tek e fundit, them të drejtën, sa i përket deklarimeve të lira që po dalin aty – këtu, mund t’ju them lirisht se edhe krejt spektri politik po të pranonte heqjen e Republikës, unë nuk e pranoj.

RADIO EVROPA E LIRË
Deri ku jeni ne gjendje të shkoni për të rifilluar procesin?

HASHIM THAÇI
Jemi duke punuar për konsolidimin dhe forcimin e shtetit. Tani kemi edhe deklarimin e Grupit Drejtues Ndërkombëtar që mbështet zotimin e Qeverisë së Republikës së Kosovës për të përmbyllur mbikëqyrjen e pavarësisë. Kemi edhe rezolutën nga Kuvendi i Republikës së Kosovës që shpreh gatishmëri dhe i jep mbështetje të plotë Qeverisë së Republikës së Kosovës në këtë drejtim.

Qeveria e Republikës së Kosovës do t’i kryejë të gjitha obligimet që dalin nga rezoluta e Kuvendit të Republikës së Kosovës. Veç kemi filluar të punojmë si grupe punuese me të gjitha autoritetet përkatëse, prandaj ritheksoj se viti 2012 do të jetë viti i suksesit të plotë të Kosovës, viti i përmbylljes së pavarësisë dhe viti i Kosovës evropiane.

RADI EVROPA E LIRË
Grupi Ndërkombëtar i Krizave ka vlerësuar se “përpjekja e Prishtinës për ta kontrolluar gjithë territorin dhe vendosmëria e serbëve të veriut për të rezistuar, mund të prodhojë më tepër viktima”. A pajtoheni me këtë konstatim ?

HASHIM THAÇI
Në asnjë rrethanë nuk do të lejojmë që të ketë veprime të dhunshme ndëretnike, por, ne do ta shfrytëzojmë gjithë autoritetin tonë, të forcës sonë kushtetuese dhe ligjore për vënie të rendit dhe ligjit, në çdo hapësirë të territorit të Republikës së Kosovës.

RADIO EVROPA E LIRË
T’i kthehemi pak skenës së brendshme politike. Zhvillimet e fundit dhe përplasjet tuaja me Vetëvendosjen kanë nxitur drojë për degradimin e fjalorit politik. Si mund të zbuten tensionet midis jush?

HASHIM THAÇI
Realisht Qeveria e Republikës së Kosovës nuk është duke u konfrontuar me askënd. Unë falënderoj gjithë spektrin politik kosovar për mbështetje të plotë që i ka dhënë zotimit të treguar në Vjenë për përmbylljen e mbikëqyrjes së pavarësisë nga trupi drejtues ndërkombëtar. Qeveria e Republikës së Kosovës është duke vazhduar të luajë rolin e vet unifikues, në kuptimin e një agjende të përbashkët shtetërore. Ne kemi qenë edhe në opozitë në vitin 2004 – 2007, kur është formuar ekipi i unitetit, kemi marrë të gjitha përgjegjësitë si lidership, duke vënë së pari interesat e shtetit mbi ato partiake.

Prandaj, edhe thirrja ime sot për gjithë spektrin politik kosovar është që të punojë së pari për Kosovën, pastaj për interesa partiake ose interesa të tjera, sepse është viti më i rëndësishëm historik për Kosovën pas vitit 1999, kur e fituam lirinë, pas vitit 2008 që e shpallëm Kosovën të pavarur dhe sovrane.

Tani është përmbyllja e pavarësisë, pra viti i hapjes së perspektivës euroatlantike. Dhe, në këtë kohë, kërkohet unitet politik, qytetar dhe shtetëror. Natyrisht, në këtë drejtim duhet respektuar mendimet e ndryshme, por këto mendime apo këto ide të mos degjenerojnë me pretendime për marrjen e mekanizmave të pushtetit nga ndonjë forcë politike, sepse kjo nuk ndodh kurrkund në botën demokratike.

Pra kemi të bëjmë me një pikëpamje të respektimit të ligjshmërisë dhe pretendime të marrjes së ligjshmërisë në duart e veta nga një mekanizëm i caktuar politik.