|

Dy motrat rrëfejnë për vrasjen e Luljeta Kurtajt

Shallin që ua kishte vënë fëmijëve të saj për t’u mbrojtur nga të ftohtit, Afërdita e kishte përdorur për ta ngulfatur vajzën e axhës së saj Luljeta Kurtajn. E kishte ftuar vetë Luljetën në shtëpinë e saj, i kishte kërkuar që t’ia lante një borxh dashnorit të saj dhe kur Luljeta kishte kërcënuar se do t’ia publikonte marrëdhënien jashtëmartesore me Mehmetin, Afërdita e kishte mbytur.

Në ndihmë i kishte dalë edhe motra e saj Adelina. Për ta fshehur krimin e kishte ndihmuar Mehmeti. Me veturën e tij, kufomën e Luljetës e kishte dërguar nga Komorani i Drenasit, ku ishte kryer krimi, në Zajm të Klinës te “Ura e Haxhisë”.
Rrëfimin për mënyrën dhe motivin e kryerjes së krimit e kishin dhënë në Polici vetë motrat Afërdita dhe Adelina pesë ditë pas kryerjes së krimit.

Afërdita (1982) me shtatë klasë shkollë, nga fshati Abri dhe e martuar në Komaran, nënë e tre fëmijëve, ka rrëfyer në polici se më 24 gusht të këtij viti rreth orës 12, motra e saj Adelina (1987) e martuar në Pejë e kishte thirrur me telefon tani të ndjerën Luljeta Kurtaj nga Abria e Drenasit që të takoheshin në shtëpinë e Afërditës në fshatin Komoran.

Pa e ditur se çfarë e priste atje, Luljeta kishte shkuar në shtëpinë e saj një orë më vonë. Por pas nja dy orë bisedash rreth një borxhi prej 50 eurosh që Luljeta i kishte dashnorit të Afërditës, Mehmetit (1971) nga Drenoci i Malishevës, Luljeta e kishte kërcënuar vajzën e axhës se do t’i tregonte bashkëshortit të Afërditës për lidhjen e saj jashtëmartesore me Mehmetin. Kjo e kishte acaruar Afërditën, e cila ishte kacafytur me të ndjerën Luljetë.

Në ndihmë së motrës kishte dalë edhe Adelina. Pas pak Afërdita e kishte lënë motrën dhe vajzën e axhës duke u kacafytur dhe kishte shkuar në dhomën e fëmijëve të saj për ta marrë një shall. Me shall të njërit prej fëmijëve të saj ishte kthyer në dhomën e kacafytjeve dhe, së bashku me motrën Adelinën, e kishin ngulfatur Luljetën.

Motrat kanë treguar se pas kryerjes së vrasjes ishin gjendur në dilema se si ta zhduknin trupin. Afërdita kishte vendosur që ta thërriste dashnorin e saj, Mehmetin, dhe t’i kërkonte ndihmë për ta larguar trupin nga shtëpia. Nuk i ishte dashur shumë për ta bindur dhe pas gjashtë orësh, Mehmeti ishte shfaqur në Komoran me “Golfin” e tij.

Ai kishte pranuar që së bashku me motrat Afërdita dhe Adelina që ta zhduknin trupin e Luljetës. Të tre bashkë e kishin mbështjellë trupin e Luljetës me një çarçaf dhe e kishin futur në bagazhin e veturës për ta dërguar drejt Drinit të Bardhë.
Trupin e kishin dërguar në fshatin Zajm të Klinës dhe kishin  hedhur nga një urë e quajtur “Ura e Haxhisë”.
Tri ditë më vonë, më 27 gusht, Policia e Kosovës kishte pranuar një informacion se në fshatin Zajm të Klinës, pikërisht tek “Ura e Haxhisë” mbi lumin Drini i Bardhë disa peshkatarë e kishin gjetur një trup të pajetë, i cili gjendej rreth 20-30 metra larg nga Ura. Njësitet patrulluese kishin dalë në vendin e ngjarjes dhe kishin vërejtur se kufoma ishte e mbështjellë me çarçaf dhe e lidhur me litar. Peshkatarët i kishin parë kufomës vetëm shputat e këmbëve.

Pas marrjes së trupit dhe zbulimit nga çarçafi, Policia kishte gjetur një telefon “Nokia” në trupin e Luljetës. Ajo nuk kishte asnjë dokument. Kjo kishte bërë që policia të mbetej pa ndonjë pistë dyshimi të bazuar.
Gjatë fazës hetimore policia kishte arritur të siguronte një informacion se numri telefonik i gjetur në trupin e viktimës që në atë kohë policia nuk e kishte identifikuar akoma, ishte i Luljeta Kurtajt, e zhdukur tri ditë më parë.
Policia kishte arritur të zbulonte se nga një numër telefoni të “Ipkos” ishin dërguar disa mesazhe në telefonin e babait të Luljetës dhe tezes së saj në emër të Luljetës, e cila tashmë ishte e vdekur. Në këto mesazhe që dërgoheshin në emër të Luljetës thuhej se ishte rrëmbyer dhe ishte viktimë e trafikimit të qenieve njerëzore.

Policia kishte bastisur shtëpinë e Afërditës pasi që ajo ishte adresa e fundit ku kishte shkuar Luljeta. Bastisja, po ashtu, ishte kryer pasi që ishte dyshuar se nga ajo mund të vinin mesazhet telefonike.
Gjatë bastisjes, policia kishte konfiskuar telefonat e gjetur e po ashtu kishte shoqëruar Afërditën dhe bashkëshortin e saj në polici për t’i pyetur rreth zhdukjes së Luljetës, e cila për herë të fundit kishte qenë në shtëpinë e tyre më datën 24 dhe që nga ajo datë familja e Luljetës nuk kishin pasur informacione për vajzën.

Fillimisht Afërdita kishte thënë në Polici se Luljeta kishte qëndruar tek ajo nga ora 13 deri në rreth orës 16:30. Kishte thënë se aty ishte si mysafire edhe e motra Adelina. Sipas saj, Luljeta kishte shkuar rreth orës 16:30 për në Drenas.

Pasi ishte bërë e ditur se një trup i një vajze ishte gjetur në lumin Drin i Bardhë, familja e Luljetës më 30 gusht kishte shkuar në morgun e Institutit mjekësor në Prishtinë për të parë se mos ishte vajza e zhdukur. Ata e kishin identifikuar se trupi i pajetë i përkiste Luljetës.
Një ditë më vonë, policia kishte pranuar një informacion se nga një numër i operatorit IPKO janë nxjerrë dy numra, të cilët ishin përdorur nga i njëjti telefon për të dërguar SMS në telefon të babait të viktimës dhe mbesës së saj.

Ky telefon ishte konfiskuar në shtëpinë e Afërditës.
Pasi ishte shoqëruar në stacion, Afërdita kishte pranuar se ajo kishte shkruar mesazhe telefonike në emër të Luljetës dhe se ajo së bashku me Adelinën e kishin vrarë Luljetën dhe trupin e saj e kishin transportuar bashkë me dashnorin e saj Mehmetin dhe e kishin hedhur në lumë.
Rreth orës 16 të po asaj dite ishte arrestuar edhe motra e saj Adelina. Edhe ajo e kishte pranuar se bashkë me motrën Afërditën e kishin vrarë Luljetën. Pas kësaj, policia ka shkuar në fshatin Drenoc për ta arrestuar Mehmetin.

Atij i ishte bastisur shtëpia dhe objektet përcjellëse dhe në oborrin e shtëpisë ishte gjetur vetura, me të cilën dyshohet të jetë transportuar kufoma e Luljetës. Ai është intervistuar dhe në prani të avokatit të tij kishte pranuar se kishte ndihmuar në zhdukjen e trupit.
Pas pranimit të kryerjes së krimit tre të dyshuarve u është caktuar masa e paraburgimit prej 30 ditësh dhe pas pak kohësh pritet të nisë gjykimi i tyre.
Trupi i Luljetës është varrosur në fshatin e saj në Abri.

Legjenda: Luljeta nuk po ia kthente Mehmetit një borxh prej 50 eurosh. Kur Afërdita po insistonte që paratë t’i ktheheshin të dashurit të saj, Luljeta kishte kërcënuar se do t’i tregonte burrit të saj për lidhjen e Afërditës me Mehmetin.

Afërdita kishte dalë nga dhoma për t’u kthyer me një shall të fëmijëve në dorë. Tri ditë më vonë kufoma e Luljetës është gjetur në Drinin e Bardhë

Etiketa: , , , , ,