Basha: Energjia në kurriz të qytetarëve

Basha: Energjia në kurriz të qytetarëve

Basha: Energjia në kurriz të qytetarëve Kryetari i Partisë Demokratike, Lulzim Basha zhvilloi një takim me përfaqësuesit e misionit të FMN-së në Tiranë, Nadeem Ilahi dhe Jens Reinke, me të cilët ndau shqetësimin mbi situatën e sektorit energjitik në vend.

Sipas një noftimi për shtyp të PD, Basha dënoi aksionet selektive të qeverisë dhe faktin se kryeministri kërcënon e ndëshkon qytetarët që s’kanë mundësi financiare, në vend që t’u japë atyre mundësi për të bërë shlyerjen e detyrimeve.

Basha shprehu bindjen e tij se nuk ka një reformë të mirëfilltë dhe konkrete në sektorin e energjisë, por vetëm një masë shtrënguese në kurriz të qytetarëve, që sipas tij aplikohet duke u ndërprerë energjinë atyre që nuk kanë mundësi të paguajnë.

Nga ana tjetër, theksoi kryetari i PD, ka një mungesë transparence nga ana e qeverisë sa i takon ndryshimit të çmimit.

“Është vetë qeveria që nuk shprehet se sa do të rritet çmimi, ndërkohë që KESH, OST dhe OSHE, që janë agjenci shtetërore, kanë dërguar kërkesat për rritje çmimi. Pra, nga njëra anë qeveria kërkon rritje dhe nga ana tjetër nuk po u thotë shqiptarëve sesa do të rritet çmimi”, u shpreh Basha.

Ndërsa sa i takon buxhetit të vitit 2015, lideri i opozitës vlerësoi se janë rritur shpenzimet qeveritare, ndërkohë që janë ulur investimet.

“Janë ulur fondet për mbështetjen sociale, nuk është shtuar numri i infermierëve apo mësuesve, por i policëve dhe i punonjësve të INUK”, deklaroi Basha.

Ai tha gjithashtu se rritja e re e taksave është e papranueshme, duke shtuar se rritja e një viti më parë ka dhënë pasoja dramatike në ekonominë e vendit.

“Një rritje e re do të thellojë recesionin e do të ketë pasoja katastrofike”, shtoi Basha. / Top Channel /